AFFA-nın yeni layihəsi: səyyar meydançalar

20.07.2010 19:58

AFFA yeni - səyyar meydança layihəsinin tətbiqinə başlayır. Bu məqsədlə AFFA tərəfindən paytaxtın müxtəlif məhəllələrində səyyar meydançalar quraşdırılacaq. Hər bir məhəllədə 1 həftə ərzində qalması nəzərdə tutulan bu tipli meydançalarda yaş həddindən asılı olmayaraq istənilən şəxs günün istənilən vaxtında futbol oynaya bilər. Bu layihə uşaqların yay tətilində asudə vaxtlarını səmərəli keçirmələri üçün "Futbol oynayaq, sağlamlığı qoruyaq" devizi altında ilkin olaraq Bakıda, sonra isə respublikanın digər bölgələrində keçiriləcək.

Səyyar meydançanın quraşdırılması üçün tələb olunan şərtlər:
1. Meydançanın quraşdırılması üçün minimum eni12 metr, uzunluğu 32 metr, maksimum eni 25 metr, uzunluğu 45 metr həyətin və ya sahənin təqdim olunması (sahə və ya həyət özəl olmamalıdır);
2. Meydança quraşdırılan sahədə məsul şəxsin müəyyən olunması;
3. Meydançanın qorunması üçün mühafizənin təşkili;
4. İcra nümayəndəsinin və bələdiyyənin məlumatlandırılması.

Əlaqə telefonu: (012) 490 80 92, (050) 232 44 00 (İş günləri saat 9:00-dan 18:00-a qədər)

Qeyd: Səyyar meydançada daha çox futbol oynayan məhəllədə AFFA tərəfindən daimi meydançanın quraşdırılması nəzərdə tutulub.

94 dəfə oxunub        Şərh yaz