“Xəzər Lənkəran”ın yeni baş məşqçisi Mirça Rednik oldu

15.07.2010 18:03

Klubun rəsmi saytının məlumatına görə, qarşıdakı 2 il ərzində "Xəzər Lənkəran" futbol klubunun yeni baş məşqçisi Rumıniya və Belçika vətəndaşlığını daşıyan Mirça Rednik olacaq. Tərəflər arasında müvafiq müqavilə İstanbul şəhərində imzalanıb.

Mirça Rednik 1962-ci il aprelin 9-da Rumuniyanın Hundoara bölgəsində anadan olub. O Rumuniyanın həm tanınmış futbolçusu, həm də baş məşqçisi olub.
Rednik futbolçu kariyerasına 1979-cu ildə doğulduğu Hundoara bölgəsinin "Karvinul" klubunda başlayıb. Klubun heyətində 127 oyun keçirən Rednik 6 qola imza atmağa nail olub. Özünün dediyinə görə, onu Rumuniyanın məşhur baş məşqçilərindən sayılan Mirça Luçesku kəşf edib. 1982-ci ildə Buxarest "Dinamo"una transfer olunan Rednik, bu klubda daha uğurlu çıxış etməyə başlayır. Klubda 8 mövsümdə 212 oyun keçirən Rednik komandasının heyətində 21 qol vurmağa nail olur. Rednik "Dinamo" klubu ilə iki dəfə ölkə çempionu, üç dəfə isə ölkə kubokuna yiyələnir. Çıxış etdiyi avroturnirlərində isə 3 dəfə fərqlənə bilir. Lakin 1992-ci ildə Türkiyə superliqasında "Bursaspor" klubunun heyətində heç cür özünü doğrulda bilməyən Rednik, Belçika "Standard"ına üz tutmalı olur. Belçika çempionatında 150 oyun keçirməklə 3 qola imza atan Rednik 1993-cü ildə ölkə kubokuna yiyələnə bilir. 1997-ci ildə yenidən Rumuniyaya - "Rapid"ə qayıdan Mirça baş məşqçi Luçeskunun rəhbərliyi altında 1998-ci ildə ölkə kubokunu başı üzərinə qaldırır. Eyni zamanda Rumuniya milli komandasında da forma geyinən Rednik ilk oyununu 1981-ci ildə İsveçrə millisinə qarşı keçirib və həmin oyun 0-0 hesabı ilə bitib. Bundan əlavə Rednik 1984-ci ildə Fransada keçirilən Avropa çempionatı, 1986 il Meksika və 1990-cı il İtaliya mundiallarında da iştirak edib. Milli komandanın heyətində ümumilikdə 83 oyunda iki dəfə fərqlənib.

2000-ci ildən isə məşqçilik fəaliyyətinə başlayan Rednikin ilk klubu da məhz futbolçu kariyerasını başa vurduğu Buxarestin "Rapid" klubu olur. Həmin mövsümdə "Rapid" dördüncü yerlə kifayətlənir. 2004-cü ildə Səudiyyə Ərəbistanına gedən Rednik "Əl Nəsr" klubu ilə müqavilə imzalayır. Lakin buradakı fəaliyyəti heç də uğurlu alınmır. Daha sonra yenidən ölkəsinə qayıdan Rednik "Vasluy" klubu ilə anlaşır. 2007-2009-cu illərdə "Dinamo" Buxarestində çalışan Rednikin son klubu isə Rusiyanın "Alaniya" klubu olub.

Sevimli klubumuzun yeni baş məşqçisinə "xoş gəlmisiniz" deyirik və ona gələcək karyerasında uğurlar, bol qələbələr arzulayırıq!

159 dəfə oxunub        Şərh yaz

Şərhlər (7)