“Xəzər Lənkəran” - “Olimpiya” 1-8 iyul 2010-cu il

30.06.2010 09:50

Avrokubok həyacanı artıq başlamaqdadır. Mövsümün əvvəlində hər birimiz bu həyacanı yaşaya bilib-bilməyəcəyimiz barədə düşünsək də, bu gün artıq bütün bunlar geridə qaldı. "Xəzər Lənkəran"ın avrokuboklara vəsiqəni təmin etməsi, nəhayət ki, doğma arenada azərkeşlərə avrokubok həyacanını yaşatmaq imkanı verdi. Elə azərkeşlər də həmin anı səbirsizliklə gözləyirdilər. Bu gün dünəndən səbirsizliklə gözlədiyimiz anın gəlib çatmasına çox az qaldı. İndi hər kəsi bir sual düşündürür. Bu dəfəki avrokubok həyacanını digərlərindən fərqləndirən cəhət nə olacaq? Bu suala bir neçə istiqamətdən yanaşsaq, elə bir neçə cavab da ala bilərik.

Əvvəlcə məsələyə müsbət tərəfdən yanaşaq. Bildiyimiz kimi, əvvəlki avrokubok oyunlarından fərqli olaraq, bu il "Xəzər Lənkəran" Moldovanın "Olimpiya" klubunu məhz doğma arenada qarşılayacaq, üstəlik birinci oyunun rəqib meydanında olması da komandamıza növbəti üstünlüyü qazandırır. Bundan başqa, "Olimpiya" klubunun bizə düşə biləcək mümkün rəqiblərin arasında nisbətən zəif komanda olması da Xəzərin mərhələ keçmək şansını artırır.

Məsələnin mənfi cəhəti isə Komandamızın transfer siyasəti ilə daha çox bağlıdır. Mövsümün sonunda hər kəsi Xəzərin transfer bombası düşündürsə də təəssüf ki, hadisələrin gedişi heç də ürəkaçan olmadı. Komandamız nəinki güclü transferlər etmədi, hətta bir neçə texnikalı oyunçuların xidmətindən də imtina etdi. Xəzərin zəif cəhətlərindən biri də, fikrimcə azərkeş dəstəyinin arzulanan səviyyədə olmayacağı barədə gedən söz-söhbətlərdir.

Bir zaman "Xəzər Lənkəran" dedikdə ilk öncə gözümüz önündə hər an ürəkləri Xəzər sevgisi ilə döyünən möhtəşəm azərkeş ordusu canlanırdısa, bu gün həmin azərkeşləri məyus və daha çox narahatçılıq içində boğulan kimi gördükdə, hər birimiz çoz üzülürük desək yanılmarıq.

Əvvəlki avrokubok oyunlarından fərqli olaraq, bu il Xəzər öz rəqibini doğma arenada qəbul etməsinə baxmayaraq, son vaxtlar əsasən Lənkəranda yaşayan Xəzər azərkeşlərinin böyük bir hissəsinin komandadan küsməsi bu mövsüm Xəzər azərkeşlərinin öz sevimli komandasını tam gücü ilə dəstəkləməsinə mane olacaq hallardan biridir. Komandamızın daha bir mənfi cəhəti isə son mövsüm ölkə çempionatında stabil çıxış edə bilməməsi və çempionluğun son turlarında dalbadal xal itirməsi ilə bağlıdır.

Yuxarıda sadalananlardan belə qənaətə gəlmək olar ki, komandamızın nisbətən zəif rəqiblə qarşılaşacağna rəğmən şanslar yarı-yarıya qiymətləndirilməlidir.
Biz isə öz növbəmizdə "Xəzər Lənkəran" və Azərbaycan naminə 8 iyul 2010-cu il tarixdə bütün futbol azərkeşlərini  Xəzər Lənkəran Mərkəzi Stadionunda komandamıza dəstək olmağa çağırırıq. Uğurlar "Xəzər Lənkəran", uğurlar Azərbaycan futbolu!

Ramin Səfərov

202 dəfə oxunub        Şərh yaz

Şərhlər (12)