Qalmaqallı sezon və sonunda...?!

31.05.2010 15:41

Bütün Cənub bölgəsinin qüruruna çevrilmiş "Xəzər Lənkəran" futbol klubu çempionluq və ölkə kuboku uğrunda uzun marafondan sonra özünə və xüsusən də öz möhtəşəm azarkeşlərinə yaraşmayan, lakin son qarşılaşmalarda göstərdiyi baxımsız və sistemsiz oyununa görə turnir cədvəlində azarkeşlərinə layiq olmayan yerdə qərarlaşdı. Mövsüm ərzində Xəzərin oynaya biləcəyindən daha aşağı səviyyədə oyun sərgiləməsinin, uğursuz transferlərinin əsl səbəbləri araşdırılmaqdansa, klub rəhbərliyi bundan müxtəlif bəhanələrlə və çox məharətlə yayındı.

"Fırtına" fan klubu olaraq hələ mövsümün əvvəlində "Xəzər Lənkəran"da baş verənlərlə bağlı həyacan siqnalı çalmışdıq. Bəs görəsən klub rəhbərliyinin bizə cavabı nə oldu..? Əslində bu qarayaxmalara bir daha qayıtmaq istəməzdim, lakin bir daha xatırlatmaq yerinə düşər deyə, olub keçənlərə kiçik bir nəzər salmaq qərarına gəldim. Həmin vaxt klub rəhbərliyi az qala bütün günahları məhz "Fırtına" fan klubunda görürdü. Hətta bizi anti-Xəzərçi adlandırmaqdan belə çəkinmirdilər və bu azmış kimi bizi Lənkərana buraxmayacaqları ilə də hədələyirdilər. Biz isə hətta atributlarımızın stadiona buraxılmamasına baxmayaraq, yenə də bütün bu təzyiqlər qarşısında öz azarkeş dəstəyimizi komandamızdan əsirgəmədik. Çoxları bizi bütün bu olaylardan sonra yenə də Xəzərə xidmət etməyimizdə qınadı. Hətta fan klubumuzun bir neçə aktiv üzvü fan klubdan ayrılmağa qərar verdi. Bütün bunlara rəğmən biz yenə də sevimli komandamızı dəstəkləməkdə davam etdik, edirik və edəcəyik də...

Ötən mövsüm Xəzər üçün bütün bu qalmaqallarla yadda qalsa da son olaylar əvvəlkiləri də arxa plana çəkdi. Belə ki, ölkə çempionu adı uğrunda mübarizənin sonunda "Xəzər Lənkəran" tarixində ilk dəfə olaraq qızıl medalları doğma meydanda qazanacaqdı. Bu oyuna bütün Xəzər azərkeşləri çox böyük hazırlıqlar görmüşdü. Bu baxımdan "Fırtına" fan klubu həmişəki kimi yenə də digər fanklublardan fərqlənirdi. Niyə də olmasın? Axı ilk dəfə olaraq, çempionluğu öz doğma meydanımızda bayram edəcəkdik... Hamı bu günü səbirsizliklə gözləyirdi və nəhayət bu böyük gün gəldi çatdı... Kaş ki, gəlib çatmayaydı... Bəli, düz eşitdiniz. Kaş ki, heç bu gün təqvimdə qeyd olunmayaydı. Bütün Xəzərsevərlərin üzüntüsü və bundan daha da dəhşətlisi oyundan sonra azərkeşlərə edilən hörmətsizlik/saymamazlıq. Yüz minlərlə Xəzər azərkeşlərinə acı məğlubiyyət yaşadan, onları artıq komandamızda ənənə halın almış hər bir prinsipial qarşılaşmada məyus edən klub rəhbərliyi azərkeşlərdən üzr istəməkdənsə onları aşağılamaqdan belə çəkinmədi.

Bununla belə, bəzi optimist azarkeşlər Xəzərin etdiyi səhvini kubok oyununda düzəldəcəyinə, "Bakı" klubundan qisas alacağına ümid edərək, müəyyən mənada təskinlik tapdılar. Bu qarşılaşmadan 8 gün sonra yəni, mayın 23-də ölkə kubokunun final oyununda yenə də Xəzərlə "Bakı" üz-üzə gəldi və 120 dəqiqənin sonu bizim bütün ümidlərimizi alt-üst etdi. Demək olar ki, bütün futbol ictimaiyyətinin məhz Xəzərin bu oyunda qalib gələcəyini proqnozlaşdırdığı halda, (buna səbəb Xəzərin öz azərkeşləri qarşısında itirilmiş nüfuzunu bərpa etməyə borclu olması idi) Xəzər yenə də rəqibi ilə yumşaq desək bacarmadı. Düzdü bu oyunda vurulan 1-ci qol heç də "Bakı" komandasına baş ucalığı gətirən qol olmadı. Lakin unutmaq lazım deyil ki, bu qol zamanı nə qədər rəqib komandanın günahı var idisə, bir o qədər də Kamran Ağayevin günahı var idi. Oyunun anti-qəhrəmanı - Kamran Ağayev sonradan mətbuata müsahibəsində "...lazım gəlsə azərkeşlərdən və klubdan üzr istəyə bilərəm..." dedi. Hə, deməli o an lazım gəlmədi. Axı lazım gəlsə idi Kamran yüz minlərlə Xəzər azərkeşlərindən üzr istəyərdi... Kamran Ağayevlə yanaşı azərkeşlərdən üzr istəməyə borclu olan və hər zaman guya azərkeşlərinin yanında olan klub rəhbərliyi də nədənsə ya buna ehtiyac duymadı ya da azərkeşlərlə bağlı hər-hansı bir təsəlliverici addım atmağı ümumiyyətlə özünə rəva bilmədi. Necə də olsa, azərkeşlərin əksəriyyəti əhalinin kasıb təbəqəsindən olanlardı və baxmayaraq ki, "Xəzər Lənkəran" naminə onlar üçün böyük məbləğdə pulundan, parasından keçib həm ev oyunlarında, həm də səfər oyunlarında komandanı dəstəkləyirlər, bu insanlardan kresloda oturanlar necə üzr istəsinlər? Bəlkə buna həqiqətən də ehtiyac yoxdur? Bəlkə biz azərkeşlər bunu haqq etməmişik? Bu gün bir çox suallara cavab axtarırıq:
Əcəba bütün bunlar nəyə hesablanıb? Həqiqətənmi klub ilə azərkeşlər arasında böyük bir uçurum yaranıb? Görəsən böyük zəhmət və xərclər bahasına klub rəhbərliyinin nəinki Lənkəranda, hətta bütün cənub bölgəsində ildırım surəti ilə artan nüfuzunun indi elə həmin sürətlə də azalmasının səbəbi yaxud səbəbkarı kimlərdir? Ağasəlim Mircavadovun yenidən baş məşqçi postunda saxlanması kluba nə verir? Nəyə görə demək olar ki, bütün Xəzər azərkeşləri Ağanın istefasını tələb etdiyi təqdirdə klub rəhbərliyi nəyin bahasına olursa olsun onunla müqaviləni yenidən uzatmaqda israrlıdır? Bundan sonra Lənkəranda yenədəmi böyük futbola maraq yüksək olacaq? Nə vaxtsa Xəzər Lənkəran rəhbərliyi əvvəlki nüfuzunu geri qaytara biləcəkmi? Bu isə göründüyündən daha çətindir. Bu gün komandadan gediləsi adamların və konkret bütün azərkeşlərin az qala ən böyük arzusu: - Ağanın gedişi əvəzinə azərkeşlərin sevimlisi Denis Kalinkovla müqavilənin uzadılmaması, azərkeşlərə olan diqqətsizlik nümunəsi deyilmi?
Ağanın "Xəzər Lənkəran"a göstərdiyi xidmətlər, Xəzərin uğurları və s. bu kimi hallar hər bir Xəzər azərkeşinin yaddaşındadır və heç kəs bu zəhmətin üzərinə kölgə salmaq niyyətində deyil. Lakin bu gün əgər biz Avropa səviyyəli bir komanda yaratmaq istəyiriksə, onda Xəzərə daha səviyyəli məşqçi gətirməliyik. Ağanın nəyə görə Xəzərə layiqli məşqçi olmaması isə bizim saytda daha öncə gedən yazılarda, bəyanatlarda öz əksini tapmışdır. O zaman Fırtınanın doğru mövqeyini əks etdirən kifayət qədər dəlillər/sübutlar gətirmişdik.

Ağasəlim Mircavadovun komandaya ikinci dəfə qayıdışına kəskin etiraz edən "Fırtına" o zaman klub rəhbərliyi tərəfindən guya klubun normal fəaliyyətinə mane olmaqda gunahlandırıldı. Bununla belə, bu gün həqiqətən də məhz "Fırtına"nın mövqeyini bütün Lənkəran dəstəkləyir. Bu, özünü son oyunlar zamanı bitərəf, heç bir fan kluba üzv olmayan, çox böyük azərkeş kütləsinin simasında daha aydın göstərdi. Biz isə "Fırtına" fan klubu olaraq, öz orjinal prinsipimizdən çəkinmədik. Hər kəs "İstefa" deyə Ağanı səsləyəndə, biz bir fan klub olaraq, Xəzəri sonunadək dəstəkləməkdə davam etdik. Hətta Bakıya evdəki məğlubiyyətdən sonra, hər kəsin klubdan küsdüyü bir vaxtda daha böyük azarkeş ordusu ilə komandamızı dəstəkləməyə gəldik və bu dəstəyi sona qədər komandamızdan əsirgəmədik. Axı fanat hər nə olursa olsun stadionda öz komandasını sonunadək dəstəkləməlidir! "Fırtına"nın böyüklüyü də elə məhz onun heç bir qüvvə tərəfindən idarə olunmamasındadır. Bu günkü mövqeyimiz isə bir daha göstərdi ki, "Fırtına" nə klub tərəfindən, nə də ki hər hansı bir kənar qüvvələr tərəfindən idarə olunmur. "Fırtına"nı idarə edənlər onun çoxsaylı üzvləri, səsi isə "Xəzər Lənkəran" azərkeşlərinin səsidir!

Sonda "Fırtına" fan klubu olaraq "Bakı" Futbol Klubunu "Fair Play" qaydalarını kobud şəkildə pozduğuna görə, "Xəzər Lənkəran" rəhbərliyini isə son iki prinsipial qarşılaşmanın hər ikisində rəqibə məğlub olmasına və bununla da həm çempionluğu, həm də ki ölkə kubokunu əldən verməklə azərkeşlərinə böyük sarsıntılar yaşatdığına görə bütün "Xəzər Lənkəran" azərkeşlərindən üzr istəməyə çağırırıq!

547 dəfə oxunub        Şərh yaz

Şərhlər (1)