Jurnalistika, Peşəkarlıq, yoxsa ....

08.09.2009 14:38

Bu gün Lənkəranın məhz Azərbaycan futbolunun paytaxtı olması heç kimə sirr deyil. Biz sentiyabrın 5-də Azərbaycan Finlandiya oyununda bir daha bunun canlı şahidi olduq. Hər şey gözəl idi. İstər oyundan əvvəl, istər oyun zamanı, istərsə də oyundan sonra Lənkəranda əsl futbol bayramının şahidi olurduq. Bu haqda nəinki Azərbaycan mətbuatı, hətta xarici jurnalistlər də ağızdolusu yazıblar. Xarici mətbuatda diqqətimi çəkən əsas məqam isə, elə əvvəlcədən güman etdiyim kimi, Lənkəranlıların qonaqpərvərliyi oldu. Oyunu uduzmağımıza baxmayaraq, Finlandiya azərkeşlərini necə mehribanlıqla qarşıladığımız kimi, eləcə də yola salmağımız onlarda bizə qarşı müsbət mənada təəccüb doğurmuşdu. "Yəni bu dərəcədə qonaqpərvərlik olarmı?" deyə onlar heyrətə gəlirdilər. Bütün bunları yazmaqda məqsədim əslində azərbaycanlıların, o cümlədən, cənub bölgəsinin necə qonaqpərvər olduqlarını açıqlamaq deyil. Bunu hamı bilir və hər kəsə məlum olan halları yenidən/təkrarən yazmağa heç bir lüzüm yoxdur. Bu yazını yazmaqda əsas məqsədim əcnəbi jurnalistlərin bu oyun barədə yazarkən, bizim bəzi idman portallarının əməkdaşlarından fərqli olaraq, sırf futbol barədə yazmaqlarıdır. Nədənsə, özlərini jurnalist adlandıran, ancaq əslində isə jurnalistikadan çox-çox uzaq olan şəxslər, Azərbaycan Finlandiya matçı barədə yazarkən, oyun barədə və ya oyun öncəsi və sonrası atmosferdən yazmaqdansa, rayonumuzda guya narkomaniyanın baş alıb getməsindən və bu kimi iyrənc əməllərdən ağızdolusu yazmışlar. Bununla da, daim peşəkarlıqdan dəm vuran bu insanlarda peşəkarlıqdan əsər-əlamətin olmaması bir daha öz təsdiqini tapdı.

Əzizlərim, birincisi siz əyər jurnalistsinizsə onda bunu başa düşməli idiniz ki, məqsədiniz bu oyun barədə yazmaq idisə, onda gərək sırf futbol barədə yazardınız. Başqa mövzulara toxunmağa heç bir ehtiyac yox idi. Yox əyər narkomaniya haqqında yazmaq istəyirdinizsə, onda bunu başqa mövzuda yaza bilərdiniz. Özünüz heç nə bacarmırsınızsa, onda heç olmazsa gündə bir dəfə hər hansı bir xarici idman saytlarını açıb oxuyun, bəlkə nəsə əldə edəsiniz. Mövzu tapa bilmirsinizsə, onda bizə müraciət edin.

Ramin Səfərov

521 dəfə oxunub        Şərh yaz